بابا وماما كان نفسهم يجيبوا بنت

_ ربنا يكتبلك كل الخير يا بنتي

قمت ودخلت اذاكر في اوضتي لقيت نفس النمره اللي كلمني منها ياسر كنسلت طبعا ورحت متصله بايهاب كأني بهرب من ياسر في اني أقرب من إيهاب اكتر

_ ايوه يا إيهاب عامل ايه

_ انا مش مصدق نفسي انك بتكلميني

_ انا مخنوقه

_مالك بس يا جميله فضفضي

_ مش عارفه بس حاسه اني عاوزه اعيط انا مش عارفه ليه انا تايهه كده

_ ده طبيعي بعد كل اللي مريتي بيه بس لازم تنسى بقى وتبدئى حياه جديده

جميله انا بحبك؛ بحبك من اول لحظه شفتك فيها

_ انا مش بحب الكلام ده

_ انا اسف لو ضايقتك بس مش قادر اخبي مشاعري انتي بقيتي كل حاجه بالنسبه لي واوعدك اني حشتغل ليل ونهار علشان ااقرب المسافه اللي بنا

قفلت السكه مع إيهاب وانا مضايقه مع انه انسان رقيق وطيب هو انا ليه بقيت كده هو انا مش حعرف احب تاني خلاص صديت من جوا من كتر الوجع

بصيت على التليفون في أيدي لقيت رساله من ياسر بيقولي فيها.......

جميله انا عارف اني ظلمتك بس ربنا انتقم مني، انا محتاجك يا جميله ومش حقدر اعدي اللي انا فيه من غيرك

انا عمري ما حبيت ولا ححب حد غيرك.... بحبك

قريت الرساله ويارتني ما قرتها دخلت في دوامه ومقارانات وافتكرت كل الحاجات الحلوه اللي كانت بنا وافتكرت برده كل الألم والعذاب اللي شفته معاه

مسحت الرساله ودخلت عند ماما تاني حضنتها وقعدت اعيطت

نمت في حضنها زي زمان

عدي كذا يوم وانا مش بروح الكليه ومش برد على تليفونات إيهاب ومش بفتح رسايل ياسر

وفي يوم وانا قاعده بدي لماما الدوا الباب خبط رحت افتح لقيت طنط مامت ياسر قدامي انا معرفتش اقولها ايه حتى كلمه اتفضلي وقفت في زوري لقيت ماما بتقولي مين يا جميله

ردت هي وقالت انا يا حجه ودخلت

وقعدت في الصالون وانهارت من العياط وقالتلي

_سامحيني يا بنتي انا ظلمتك وصدقت كلام ياسر وافتكرتك ظلماه بس والله ربنا جابلك حقك ياسر بعد ما طلقك عرف أمتك وحزن وجاله المرض الوحش

_ انتي بتقولي ايه يا طنط، لا حول ولا قوه الا بالله

_ ارجعيله يا جميله هو محتاجك

_مالهوش لازمه الكلام ده يا طنط ربنا يشفيه ويعافيه يااارب بس اللي بنا خلاص انتهى

_ لا يا جميله يا بنتي انتي مش فاهمه ياسر من ساعه ما سبتيه وهو ندمان وحزين عليكي ولما تعب نفسيته سائت اكتر ومش مستجيب للعلاج انتي الأمل الوحيد اللي ليا يا بنتي ارجوكي حاولي تسامحيه وتقفي جمبه يمكن ربنا يغفرله ويشفيه